မြန်မာနိုင်ငံမှာ ကိုဗစ်-၁၉ ရောဂါ မျိုးရိုးဗီဇပြောင်းလဲတဲ့ပိုးတွေ့သူ ၁၅ ဦးတွေ့ခဲ့တယ်ဆိုပြီး ကျန်းမာရေးဝန်ကြီးဌာနက မနေ့က စက်တင်ဘာလ ၁ ရက်နေ့က သတင်းထုတ်ပြန်ခဲ့ပါတယ်။

အဲ့ဒီ ဓာတ်ခွဲသုတေသန အရ ပြင်းထန်တဲ့ ဒယ်လ်တာမျိုးစိတ်ဗီဇပြောင်းပိုးတွေ့သူ ၁၅ ဦးထဲမှာ ကာကွယ်ဆေးထိုးထားသူ ၉ ဦး အထိပါဝင်နေတယ်လို့ ကျန်းမာရေးဝန်ကြီးဌာနက ပြောခွင့်ရ ဒေါက်တာခင်ခင်ကြီးကပြောပါတယ်။

ဒါအပြင် စစ်ဆေးတွေ့ရှိတဲ့ကူးစက်ခံရသူ ၁၅ ဦးထဲမှာ အသက် ၁၆ နှစ်အောက် ကလေးငယ်နှစ်ဦးလည်း ပါဝင်တယ်လို့ဆိုပါတယ်။

ဒယ်လ်တာမျိုးစိတ်ဗီဇပြောင်းပိုးတွေ့သူ ကာကွယ်ဆေးထိုးပြီးသူ ၉ ဦးအနက် ၂ ဦးသာ ရောဂါ အသင့်အတင့်အပြင်းအထန် ဖြစ်ပြီး ကျန် ၇ ဦး ဟာသာမာန်လက္ခဏာပဲ တွေ့ရှိရတယ်လို့ ဒေါက်တာခင်ခင်ကြီးက ပြောပါတယ်။

ဒီမျိုးစိတ်ဟာ ရောဂါပိုးမျိုးစိတ်အသစ်တွေ့တာ မဟုတ်ဘဲ ကျန်းမာရေးဝန်ကြီးဌာန အနေနဲ့ ဒီမျိုးစိတ်တွေနဲ့ပတ်သက်လို့ စဥ်ဆက်မပြတ် လေ့လာနေပြီး တွေ့ရှိချက်ကို ထုတ်ပြန်တာလို့ဆိုပါတယ်။ မနေ့က ကိုဗစ်-၁၉ ရောဂါ မျိုးရိုးဗီဇပြောင်း ပိုးတွေ့သူ ၁၅ ဦးတွေ့ရှိခဲ့တဲ့ အနက် နေပြည်တော်က အများဆုံးဖြစ်ပြီး၊ ရန်ကုန် ၊ မန္တလေး၊ စစ်တွေ၊ တောင်ငူ၊ လားရှိုး၊မော်လမြိုင်၊ မုံရွာနဲ့ ကလေးမြို့တို့ကလည်း ပါဝင်တယ်လို့ ဆိုပါတယ်။

ကိုဗစ်တတိယလှိုင်း လျော့ကျပေမယ့် မြို့နယ်တွေမှာ ဒယ်လတာမျိုးစိတ်ပျံ့နှံ့မှုရှိနေဆဲ

မြန်မာနိုင်ငံမှာ ကိုဗစ်တတိယလှိုင်းလျော့ကျပေမယ့် ဒယ််တာမျိုးစိတ်ပျံ့နှံ့မှုရှိနေဆဲဖြစ်တယ်လို့ ကျန်းမာရေးဝန်ကြီးဌာနက တာဝန်ရှိသူတစ်ဦးက ဘီဘီစီကို ပြောပါတယ်။

ဒယ်လ်တာမျိုးစိတ်ဟာ မြို့နယ်အနှံ့နေရာ အနှံ့မှာ ရှိနေဆဲဖြစ်ပြီး မနေ့က စက်တင်ဘာလ ၁ ရက်နေ့က ဒါကို ပြည်သူလူထုကြားသတိထားမိအောင် အသိပေးထုတ်ပြန်ခဲ့တာဖြစ်တယ်လို့ သူ ကပြောပါတယ်။

အဲ့ဒီ ဓာတ်ခွဲသုတေသန အရ ပြင်းထန်တဲ့ ဒယ်လ်တာမျိုးစိတ်ဗီဇပြောင်းပိုးတွေ့သူ ၁၅ ဦးဟာ နေပြည်တော်က အများဆုံးဖြစ်ပြီး၊ ရန်ကုန် ၊ မန္တလေး၊ စစ်တွေ၊ တောင်ငူ၊ လားရှိုး၊မော်လမြိုင်၊ မုံရွာနဲ့ ကလေးမြို့တွေကဖြစ်တယ်လို့ ဆိုပါတယ်။

အဲဒီမြို့တွေထဲကတောင်ငူ မြို့ က ကိုဗစ်ကူးစက်မှုကတော့ ကူးစက်မှုကျဆင်း တာမရှိဘဲ တန့်နေတဲ့အနေအထားရှိနေသလို အောက်ဆီဂျင်လိုအပ်တဲ့သူကလည်း နေ့စဉ် လူ ၂၀၀ နဲ့ ၃၀၀ ကြားရှိနေဆဲလို့ ဆိုပါတယ်။

တတိယလှိုင်း အပြင်းအထန်ဖြစ်ပွားခဲ့တဲ့ ကလေးမြို့မှာ ကိုဗစ်စင်တာတွေပိတ်သွားပေမယ့် အခုလို ဒယ်လ်တာမျိုးစိတ်ကူးစက်မှုကို လည်းစောင့်ကြည့်သတိထားနေတယ်လို့ လည်းမြို့ခံ ကိုဗစ်စေတနာဝန်ထမ်းတွေကပြောပါတယ်။

BBC