တရုတ်နိုင်ငံ ယူနန်ပြည်နယ် တက်ဟုန်းပြည်နယ်ခွဲ ရွှေလီမြို့မှ မြန်မာနိုင်ငံ မူဆယ်ဒေသသို့ ကူညီပံ့ပိုးတည်ဆောက်ပေးသည့် ကိုဗစ်-၁၉ ကုသရေးစင်တာကို အောက်တိုဘာ ၁ ရက်တွင် စတင်ဖွင့်လှစ်ခဲ့ကြောင်းသိရသည်။

ဖွင့်ပွဲအခမ်းအနားကို တက်ဟုန်းပြည်နယ်ခွဲနှင့် မူဆယ်ဒေသ သက်ဆိုင်ရာ ကိုယ်စားလှယ်များက ဗွီဒီယိုဖြင့် တက်ရောက်ခဲ့ကြသည်။ မြန်မာနိုင်ငံ မူဆယ်မြို့ ၁၀၅ မိုင်တွင် သက်ဆိုင်ရာအရာရှိများက ကုသရေးစင်တာအား ဖဲကြိုးဖြတ် ဖွင့်လှစ်ပေးခဲ့ပြီး တရုတ်နိုင်ငံ ရွှေလီမြို့အစိုးရ အင်ဂျင်နီယာဆောက်လုပ်ရေးလုပ်ငန်း ကိုယ်စားလှယ်များက ကုသရေးစင်တာ ဆောက်လုပ်ရေးဆိုင်ရာ အချက်အလက်များအား ၁၀၅မိုင် ကုန်သွယ်ရေးဌာနသက်ဆိုင်ရာသို့ လွှဲပြောင်းပေးခဲ့သည်။
“ကိုဗစ်-၁၉ ကပ်ရောဂါဖြစ်ပွားတဲ့အချိန်ကစပြီး တက်ဟုန်းပြည်နယ်ခွဲနှင့်မူဆယ်ဒေသဟာ တရုတ်-မြန်မာနှစ်နိုင်ငံ နယ်စပ်နေပြည်သူများရဲ့ ကျန်းမာရေး၊ အသက်အိုးအိမ်စည်းစိမ်ကို ကြိုးပမ်းကာကွယ်ဖို့ ကပ်ရောဂါကို လက်တွဲအတူ တိုက်ဖျက်ခဲ့ကြပါတယ်”ဟု တက်ဟုန်းပြည်နယ်ခွဲ ဒုတိယပြည်နယ်ခွဲမှူး လျိုရိဖုန်က ဆိုသည်။ တရုတ်နိုင်ငံ အစိုးရ အဆင့်ဆင့်၏ ထောက်ခံအားပေးမှုအောက်တွင် တက်ဟုန်းပြည်နယ်ခွဲ ရွှေလီမြို့သည် ရွှေလီမြို့ရှိ မြန်မာနိုင်ငံသားများအတွက် အခမဲ့ Nucleic acid စစ်ဆေးပေးမှု အကြိမ်ရေပေါင်း (၂.၃၆)သန်းရှိပြီး မြန်မာနိုင်ငံသား ကိုဗစ်ရောဂါ ဝေဒနာရှင် (၁၁၃)ဦးကို အခမဲ့ ကုသပေးခဲ့ကြောင်း၊ မြန်မာနိုင်ငံ မူဆယ်ဒေသသို့ ကာလတန်ဖိုး ယွမ် သန်း(၂၀)ကျော်ရှိသည့် ကပ်ရောဂါထိန်းချုပ်ကုသရေး အထောက်အပံ့ပစ္စည်းများနှင့်အင်ဂျင်နီယာသုံးပစ္စည်းများအား ပေးအပ်လှူဒါန်းကူညီခဲ့ကာ ယင်းဒေသ ကပ်ရောဂါထိန်းချုပ်ကာကွယ်ထိန်းချုပ်ရေး လုပ်ငန်းအသီးသီးအားကောင်းလာစေရန်အတွက် ကြိုးပမ်းကူညီခဲ့ကြောင်း ၎င်းက ပြောကြားခဲ့သည်။
တက်ဟုန်းပြည်နယ်ခွဲ ရွှေလီမြို့မှ မြန်မာနိုင်ငံ မူဆယ်ဒေသအတွက် ကူညီတည်ဆောက်ပေးသည့် ကိုဗစ်-၁၉ ကုသရေးစင်တာ ဖွင့်လှစ်အသုံးပြုနိုင်ခြင်းသည် တရုတ်-မြန်မာ အပြန်အလှန်ဖေးမကူညီကြသည့် အေးတူပူအမျှစိတ်ဓါတ်ကို လက်တွေ့ဆောင်ရွက်ခြင်း ဖြစ်ကြောင်း၊ မူဆယ်၏ကပ်ရောဂါထိန်းချုပ်ကုသရေးအတွက် အပြုသဘောအကျိုးဆောင်နိုင်မည်ဖြစ်ရာ ကပ်ရောဂါတိုက်ဖျက်ရေးအတွက် တူစုံလက်ညီ ဆက်လက်ဆောင်ရွက်သွားလိုကြောင်း လျိုရိဖုန်က ပြောကြားခဲ့သည်။
ယခု တရုတ်နိုင်ငံမှ ကူညီပံ့ပိုးတည်ဆောက်ပေးသည့် ကုသရေးစင်တာသည် ခေတ်မီအဆင့်ရှိရာ မူဆယ်ဒေသ ဆေးကုသစောင့်ရှောက်မှု ကောင်းမွန်အောင် ဆောင်ရွက်ရာတွင် အရေးပါကြောင်း ၊ ရောဂါကာကွယ်ထိန်းချုပ်ရေးလုပ်ငန်းများကို ကောင်းမွန်အောင် ကြိုးပမ်းဆောင်ရွက်သွားမည်ဖြစ်ရာ တရုတ်နိုင်ငံနှင့်အတူ လက်တွေ့ကျသည့်ပူးပေါင်းဆောင်ရွက်မှုများကို အားဖြည့်ဆောင်ရွက်ရင်း ကပ်ရောဂါတိုက်ဖျက်ရေး ဆောလျင်စွာ အနိုင်ရပြီး နှစ်ဖက်စီးပွားဖွံ့ဖြိုးတိုးတက်ရေး အခြေခံအတွက် အတူကြိုးပမ်း ဆောင်ရွက်သွားလိုကြောင်း မူဆယ်ဒေသ သက်ဆိုင်ရာအရာရှိများက ပြောကြားခဲ့သည်။
အဆိုပါ ကိုဗစ်-၁၉ ကုသရေးစင်တာကို ယခုနှစ် ဩဂုတ်လတွင် စတင်တည်ဆောက်ခဲ့ခြင်းဖြစ်ပြီး အပိုင်း ၈ ပိုင်း၊ လူနာကုတင် ၁,၀၀၀ နှင့် ဆေးကုသသုံး စက်ပစ္စည်းများ၊ ဆေးဝါးထောက်ပံ့ရေးပစ္စည်းများ ပါဝင်ကြောင်း သိရသည်။
(Xinhua)