ရခိုင်ပြည်နယ်မှပြန်လာသူများအားလုံးမှာ ရောဂါပျိုးချိန် ၁၄ ရက်နှင့် ၂ဆ ၂၈ ရက်အတွင်း လိုက်နာအပ်သည့် အချက်များနှင့်
ပတ်သက်၍ ရန်ကုန်တိုင်းဒေသကြီး ကျန်းမာရေးဦးစီးဌာနမှ အသိပေးကြေညာထားပါသည်။
လူနာအမှတ် ၅၈၄ သည် တောင်ဒဂုံ တွင် နေထိုင်ပြီး ရန်ကုန်မှစစ်တွေမြို့သို့ လေကြောင်းဖြင့် ၁၂.၈..၂၀၂၀ ရက်နေ့တွင်သွားရောက်ခဲ့ပြီး ၁၄ရက်နေ့တွင် ရန်ကုန်သို့ ပြန်လည်ရောက်ရှိခဲ့ပါသည်။
၎င်းမှာ ၂၂ ရက်နေ့တွင် အနံ့ပျောက်ခြင်းလက္ခဏာ စတင်ခံစားရပြီး ၂၆ ရက်နေ့တွင် တောင်ဒဂုံမြို့နယ် ဖျားနာကုသမှုဆေးခန်းတွင် သွားရောက်ပြသခဲ့ပါသည်။
ဆေးခန်းမှ သင်္ဃန်းကျွန်းဆေးရုံကြီးသို့လွှဲပြောင်းခဲ့ရာမှ သံသယလူနာအဖြစ်ကုသမှုပေး ဓါတ်ခွဲစစ်ဆေးရာ ပိုးတွေ့လူနာအဖြစ် အတည်ပြုနိုင်ခဲ့ခြင်းဖြစ်ပါသည်။
ထိုဖြစ်စဥ်ကိုကြည့်လျှင် လူနာမှာ ပြန်လာပြီးနောက် ၈ ရက်မြောက်နေ့မှသာ ရောဂါလက္ခဏာစတင်ခံစားရသည့်အတွက် ထိုရက်မတိုင်ခင် ပထမနေ့များ၌ မူလအတိုင်း မိမိ၏နေ့စဥ်လုပ်ငန်များဆောင်ရွက်နေသည့်အတွက် ညွန်ကြားချက်များ မလိုက်နာခဲ့လျှင် အခြားသူများကူးစက်နိုင်ပါသည်။
သို့ဖြစ်ပါ၍ ရခိုင်ပြည်နယ်မှပြန်လာသူများအားလုံးမှာ ရောဂါပျိုးချိန် ၁၄ ရက်နှင့် ၂ဆ ၂၈ ရက်အတွင်း
မိမိတို့၏နေအိမ်များတွင် ၂၁ရက်နေထိုင်ကြပါရန်၊
၂၁ ရက်ပြည့်မြောက်ပြီးနောက် မလိုအပ်ဘဲအပြင်မထွက်ရန်နှင့်
Mask တပ်ခြင်း၊
၆ပေအကွာမှ ပြောဆိုဆက်ဆံခြင်း၊
လက်ခဏခဏဆေးခြင်း တို့ကို ဆောင်ရွက်ပေးပါရန် တိုက်တွန်းအပ်ပါသည်။
ဩဂုတ်လ ၁၀ရက်နေ့ နောက်ပိုင်း ရခိုင်ပြည်နယ်မှပြန်လာသူများအနေဖြင့် မိမိ မြို့နယ်ရှိကျန်းမာရေးဌာနကို အကြောင်းကြားပေးကြပါ။
လက္ခဏာ တစ်ခုခုခံစားရပါကလည်း ကျန်းမာရေးဌာနကိုအကြောင်းကြားပါက ဆေးရုံလွှဲပြောင်းနိုင်ရန်စီစဥ်ပေးပါမည်။လမ်းတွင် အခြားသူများအား ကူးစက်မှုမရှိစေရန်အတွက် ဖြစ်ပါသည်။
ရန်ကုန်တိုင်းဒေသကြီး ကျန်းမာရေးဦးစီးဌာနအနေဖြင့်လည်း ၁၀ ရက်နေ့မှစ၍ ရခိုင်မှပြန်လာသူများအား Home Quarantine နေရန် အကြောင်းကြားခြင်း၊ ဓါတ်ခွဲနမူနာစစ်ဆေးပေးခြင်းများ ဆောင်ရွက်လျက်ရှိပါသည်။
ပိုးတွေလူနာများနှင့် ထိတွေ့မှုရှိသူများအားလည်း ရှာဖွေပြီး Quarantine Center များတွင်အသွားအလာကန့်သတ်ခြင်း၊ ဓါတ်ခွဲစစ်ဆေးခြင်းများ ဆောင်ရွက်လျက်ရှိပါကြောင်း တင်ပြအပ်ပါသည်။
ထို့ပြင် မိဘပြည်သူများထံ ပန်ကြားချက် (၃)ချက် ကိုလည်း ရန်ကုန်တိုင်းဒေသကြီး ကျန်းမာရေးဦးစီးဌာနမှ ထုတ်ပြန်ကြေညာထားပါသည်။
(၁) COVID-19 ရောဂါသည် လေမှတဆင့်ကူးစက်တတ်သောရောဂါ (Air borne disease)ဖြစ်နိုင်ခြေများသောကြောင့် အလွန်ကူးစက်မြန်သော ရောဂါဖြစ်ပါသည်။
(၂) သင်ကိုယ်တိုင် ရောဂါပိုးရှိသူဖြစ်နေနိုင်သောကြောင့် ရောဂါပြန့်ပွားမှုကို ကာကွယ်ထိန်းချုပ်နိုင်ရန်အတွက် သင်၏ ရောဂါပိုးရှိသူများနှင့် ထိတွေ့မှုရာဇဝင်၊ ခရီးသွားရာဇဝင်နှင့်၊ ရောဂါလက္ခဏာ ပြသမှု ရာဇဝင်များကို နီးစပ်ရာကျန်းမာရေးဌာနများထံ အချိန်မီ သတင်းပို့ခြင်းဖြင့် မိမိချစ်ခင်ရသော မိသားစုများနှင့် မိတ်ဆွေ၊ သူငယ်ချင်းများထံ ရောဂါပြန့်ပွားမှု မရှိရအောင် တားဆီးနိုင်ပါသည်။
(၃) ယခုရရှိသော သတင်းစကားအား လက်လှမ်းမီသရွေ့ ပြန်လည်လက်ဆင့်ကမ်းခြင်းအားဖြင့် မိမိ၏ ပတ်ဝန်းကျင်တွင် COVID-19 ရောဂါပြန့်ပွားမှုထိန်းချုပ်ရာတွင် ပူးပေါင်းပါဝင်ပေးကြပါ။