လက်ရှိကိုဗစ်ကာကွယ်ဆေးများ Omicron မျိုးကွဲဗိုင်းရပ်ကို တားဆီးနိုင်ခြေ ရှိမရှိ မသေချာ
လက်ရှိ COVID-19 ရောဂါ ကာကွယ်ဆေးတွေဟာ Omicron ကိုဗစ်ဗီဇမျိုးကွဲကြောင့်ဖြစ်လာတဲ့ ပြင်းထန်ရောဂါကို ကာကွယ်တားဆီးနိုင်မှာ မဟုတ်ဘူးဆိုတာ အထောက်အထားမရှိသေးဘူးလို့ Oxford တက္ကသိုလ်က ဒီကနေ့ပြောပါတယ်။
ဒါပေမယ့်လည်း လိုအပ်တယ်ဆိုရင် AstraZeneca ကုမ္ပဏီနဲ့ သူတို့တက္ကသိုလ် ပူးတွဲထုတ်လုပ်ထားတဲ့ ကိုဗစ်ကာကွယ်ဆေးကို အလျင်အမြန် မွမ်းမံထုတ်လုပ်ဖို့ အဆင်သင့်ပဲလို့လည်း ဆိုပါတယ်။
လက်ရှိ COVID-19 ရောဂါ ကာကွယ်ဆေးတွေဟာ Delta ကိုဗစ် ဗီဇမျိုးကွဲကို ထိထိရောက်ရောက် ကာကွယ်နိုင်သလိုမျိုး Omicron ကိုလည်း ကာကွယ်နိုင်မယ်ဆိုတာ မသေချာလှဘူးလို့ Moderna ဆေးထုတ်လုပ်ရေးကုမ္ပဏီ အကြီးအကဲက ဒီကနေ့အစောပိုင်းမှာ ပြောခဲ့ပြီးတဲ့နောက် Oxford တက္ကသိုလ်ဘက် က ပြောဆိုချက် ထွက်လာတာပါ။
Omicron နဲ့ပတ်သက်ရင် ခုချိန်ထိ ရထားတဲ့အချက်အလက်တွေက နည်းနေသေးပြီး ဒီဗီဇမျိုးကွဲ ကိုရိုနာဗိုင်းရပ်စ်က သူတို့ရဲ့ကာကွယ်ဆေးအပေါ် ဘယ်လိုသက်ရောက်မှု ရှိတယ်ဆိုတာ သေချာဆန်းစစ်သွားမယ်လို့ ပြီးခဲ့တဲ့သီတင်းပတ်မှာ AstraZeneca ကုမ္ပဏီက ပြောထားတဲ့အတိုင်း Oxford တက္ကသိုလ်ကပြောပါတယ်။
Financial Times သတင်းဌာနနဲ့ Moderna ကုမ္ပဏီ အမှုဆောင်အရာရှိချုပ် Stéphane Bancel တို့ တွေ့ဆုံမေးမြန်းခန်းမှာ ပြောခဲ့တာတွေနဲ့ပတ်သက်ပြီး မှတ်ချက်ပေးဖို့ Moderna ကုမ္ပဏီကို ရိုက်တာက ဆက်သွယ်ခဲ့ပေမယ့် အကြောင်းမပြန်ခဲ့ပါဘူး။ ဒါ့အပြင် Moderna ကုမ္ပဏီထုတ် ကိုဗစ်ကာကွယ်ဆေးက Omicron ကိုဗစ်ဗီဇမျိုးကွဲကို ဘယ်လောက် ထိထိရောက်ရောက် ကာကွယ်နိုင်တယ်ဆိုတဲ့ အချက်အလက်တွေ ဘယ်တော့ရမယ်လို့ ခန့်မှန်းထားပါသလဲ ဆိုတာကိုလည်း မဖြေခဲ့ပါဘူး။
Omicron ကိုဗစ် ဗီဇမျိုးကွဲဟာ အန္တရာယ် သိပ်ကြီးတယ်လို့ ကမ္ဘာ့ကျန်းမာရေးအဖွဲ့ (WHO) က ပြောထားပါတယ်။
နိုဝင်ဘာလ ၂၄ ရက်နေ့က တောင်အာဖရိကမှာ စပြီး စစ်ဆေးတွေ့ရှိခဲ့တဲ့ Omicron ကိုဗစ် ဗီဇမျိုးကွဟာ အခုဆိုရင် နိုင်ငံပေါင်း တဒါဇင်ကျော်မှာ ကူးစက်ပျံ့နှံ့နေပြီဖြစ်ပါတယ်။