လာအိုနိုင်ငံ၌ ယခုနှစ် နှစ်စပိုင်းမှ လက်ရှိအချိန်အထိ နိုင်ငံတစ်ဝန်းတွင် သွေးလွန်တုပ်ကွေး ရောဂါကူးစက်ခံရသူ ၂၆၈၆၇ ဦးရှိပြီး အဆိုပါ ရောဂါကူးစက်ခံရမှုကြောင့် သေဆုံးသူ ၂၁ ဦး ရှိကြောင်း လာအိုနိုင်ငံ ကျန်းမာရေးဝန်ကြီးဌာနက ယနေ့တွင် ပြောကြားသည်။
မိုးရာသီ၌ အဖြစ်အများဆုံး သွေးလွန်တုပ်ကွေးရောဂါသည် မြန်မာနိုင်ငံအတွင်း ဖြစ်ပွားသူ ၂၈၆၀ ဦးကျော်ရှိပြီး သေဆုံးသူ ၂၀ ဦးထိရှိလာသဖြင့် သွေးလွန်တုပ်ကွေးရောဂါကြောင့် သေဆုံးမှုအန္တရာယ်သတိပြုရန် ကျန်းမာရေးနှင့် အားကစားဝန်ကြီးဌာနက ထုတ်ပြန်ကြေညာထားကြောင်း သိရသည်။
မြန်မာနိုင်ငံ၌ သွေးလွန်တုပ်ကွေး ရောဂါ ဖြစ်ပွားသူ အရေအတွက်မှာ ယခင်နှစ် အလားတူကာလနှင့် နှိုင်းယှဉ်ပါက လျော့နည်း ကျဆင်းသွားခဲ့ကြောင်း ကျန်းမာရေး နှင့် အားကစား ဝန်ကြီးဌာန ၊ ပြည်သူ့ကျန်းမာရေး ဦးစီးဌာန ၊ ဒုတိယ ညွှန်ကြားရေးမှူး သွေးလွန်တုပ်ကွေးရောဂါ ကာကွယ်နှိမ်နင်းရေး စီမံချက် မန်နေဂျာ ဒေါက်တာ နေရည်ရည်လင်းက ပြောကြားခဲ့သည်။
ပါကစ္စတန်နိုင်ငံတွင် သွေးလွန်တုပ်ကွေးရောဂါ ကူးစက်ခံရသူ အရေအတွက်မြင့်တက်လာခြင်းကြောင့် လွန်ခဲ့သည့် သီတင်းသုံးပတ်အတွင်း ပါကစ္စတန်နိုင်ငံ၏ ဒေသအသီးသီးတွင် သွေးလွန်တုပ်ကွေး ရောဂါဖြင့်သေဆုံးသူ အနည်းဆုံး ၂၀ရှိကြောင်း ဒေသဆိုင်ရာကျန်းမာရေးဌာနများက သတင်း ထုတ်ပြန်ထားပါသည်။
