ထိုင်းနိုင်ငံမှာ ဗီဇပြောင်း ကိုဗစ်ရောဂါအသစ် Omicron ပိုးတွေ့တဲ့လူနာ တွေ့ရှိပြီလို့ ထိုင်းကျန်းမာရေးဝန်ကြီးဌာနက သတင်းထုတ်ပြန်ခဲ့ပါတယ်။ ဒီလူနာဟာ စပိန်နိုင်ငံကတဆင့် ဝင်ရောက်လာတဲ့ အမေရိကန် နိုင်ငံသားတဦးဖြစ်ကြောင်း ပြောကြားခဲ့ပါတယ်။

ထိုင်းနိုင်ငံအတွင်း ဗီဇပြောင်း ကိုဗစ်ရောဂါအသစ် Omicron စောင့်ကြည့်မှုနဲ့ ပတ်သက်လို့ ဖြစ်ထွန်းတိုးတက်မှုတွေကို ထိုင်းကျန်းမာရေးဝန်ကြီးဌာနက ဒီကနေ့မှာပဲ အသိပေး ကြေညာခဲ့ရာမှာ ဗီဇပြောင်း ကိုဗစ်ရောဂါအသစ် Omicron ပိုးတွေ့တဲ့လူနာ တွေ့ရှိပြီလို့ ဆိုခဲ့ပါတယ်။
ကုသရေးသိပ္ပံ ညွှန်ကြားရေးမှူးချုပ် ဒေါက်တာ Supakit Sirilak ကတော့ ထိုင်းဘာသာနဲ့ အခုလိုပြောဆိုသွားပါတယ်။
“ထိုင်းနိုင်ငံမှာ ပထမဦးဆုံးတွေ့ရှိတဲ့ ဗီဇပြောင်း ကိုဗစ်ရောဂါအသစ် Omicron လူနာ ဖြစ်ပါတယ်။ နောက်ထပ်လည်း ထပ်ပြီး တွေ့နိုင်ပါသေးတယ်။ ပြည်သူလူထုအနေနဲ့ သိပ်ပြီး စိုရိမ်မှုမဖြစ်ဖို့ ပြောချင်ပါတယ်လို့ ပြောဆိုသွားပါတယ်။”
Omicron ကူးစက်ခံရသူဟာ စပိန်နိုင်ငံကနေတဆင့် ထိုင်းနိုင်ငံကို ဝင်ရောက်လာတဲ့ အမေရိကန် နိုင်ငံသားတဦးဖြစ်ပြီး သူ့ကို နိုဝင်ဘာ ၃၀ ရက်နေ့မှာ နမူနာစစ်ဆေးရာ ဗီဇပြောင်း ကိုဗစ်ရောဂါအသစ် Omicron ဖြစ်နိုင်ချေ ၉၉ ဒသမ ၉၂ ရာခိုင်နှုန်း မြင့်မားခဲ့တယ်လို့ ဆိုပါတယ်။ ဒီဇင်ဘာ ၃ ရက်နေ့ ထပ်မံစစ်ဆေးချက်အရ ထိုင်းနိုင်ငံမှာ ပထမဦးဆုံးတွေ့ရှိတဲ့ ဗီဇပြောင်း ကိုဗစ်ရောဂါအသစ် Omicron လူနာအဖြစ် သေချာသလောက် ဖြစ်နေပြီဟု ညွှန်ချုပ်က ပြောဆိုခဲ့ပါတယ်။
ဆေးသိပ္ပံဌာန ညွှန်ကြားရေးမှူးချုပ် Supakit Sirilak ပြောတဲ့အထဲမှာ အသက် ၃၅ နှစ်အရွယ် အမျိုးသားတဦး ထိုင်းနိုင်ငံကို ရောက်ရှိလာချိန်မှာ ထိုင်းဘက်က ကိုဗစ်စစ်ဆေးတဲ့ RT-PCR စမ်းသပ်မှုလုပ်ခဲ့ရာမှာ ဗီဇပြောင်း ကိုဗစ်ရောဂါ အမျိုးအစားသစ်ကို တွေ့ရှိခဲ့ကြောင်း ပြောကြားခဲ့ပါတယ်။
ရောဂါထိန်းချုပ်ရေးဌာန အကြီးအကဲ ဒေါက်တာ Opas Karkawinpong ကတော့ Omicron ပိုး ကူးစက်ခံရသူ ဒီစီးပွားရေးသမားဟာ ထိုင်းနိုင်ငံကို မရောက်ရှိခင် တနှစ်အလိုမှာ စပိန်မှာနေထိုင်ခဲ့တဲ့ အမေရိကန်နိုင်ငံသား ဖြစ်ကြောင်း ပြောကြားခဲ့ပါတယ်။
ဒီအမျိုးသားဟာ နိုဝင်ဘာ ၂၈ ရက်မှာ စပိန်မှာ RT-PCR စမ်းသပ်မှုကို ခံယူခဲ့ပြီး အာရပ်စော်ဘွားများနိုင်ငံကတဆင့် ထိုင်းနိုင်ငံသို့ ထွက်ခွာလာခဲ့ကြောင်း ဒေါက်တာ Opas က ပြောကြားခဲ့ပါတယ်။ သူဟာ Johnson & Johnson ကာကွယ်ဆေး ထိုးပြီးထားသူလို့လည်း ဆိုပါတယ်။ ပြီးခဲ့တဲ့ သောကြာနေ့တုန်းကတော့ သူ့ကို အသေးစိတ်စစ်ဆေးမှု လုပ်ခဲ့ပြီး အခုလက်ရှိ ဆေးရုံမှာ ဆေးကုသမှု ခံယူနေတယ်လို့လည်း ပြောကြားခဲ့ပါတယ်။
ထိုင်းနိုင်ငံမှာတော့ ဗီဇပြောင်း ကိုဗစ်ရောဂါပိုးသစ် Omicron ကို အနီးကပ် စောင့်ကြည့်နိုင်ဖို့ ထိုင်းနိုင်ငံ နယ်စပ်တွေရဲ့ လုံခြုံရေးကို တိုးမြှင့် အထူးကြပ်မတ်စစ်ဆေးဖို့နဲ့ နိုင်ငံခြားသားတွေကို ကျန်းမာရေးအရ ပြန်လည်တင်းကျပ်စွာ စစ်ဆေးဖို့တွေကို ထိုင်းဝန်ကြီးချုပ် Prayut Chan-o-cha က နိုဝင်ဘာလ ၃၀ ရက်နေ့က ဌာနဆိုင်ရာတွေကို ညွှန်ကြားချက် ထုတ်ပြန်ထားပါတယ်။
ဗီဇပြောင်း ကိုဗစ်ရောဂါပိုးအသစ် Omicron ထိုင်းနိုင်ငံထဲ ဝင်ရောက်ကူးစက်ပျံ့နှံ့မှာ ကာကွယ်တဲ့အနေနဲ့ အာဖရိကနိုင်ငံ ၈ နိုင်ငံက ခရီးသွားတွေကို ပြည်ဝင်ခွင့် မပြုတော့ပေမယ့် ပြီးခဲ့တဲ့ ၂ ပတ်အတွင်း အာဖရိကနိုင်ငံတွေကနေ ဝင်လာတဲ့ ခရီးသွား ၈၀၀ နီးပါး ရှိခဲ့တာပါ။ ဒီအတွက် ထိုင်းပြည်သူတွေကြား စိုးရိမ်ပူပန်မှုတွေ ရှိနေသလို မြန်မာအလုပ်သမားတွေကြားမှာလည်း ကူးစက်မှုအသစ်တွေ ဖြစ်လာရင် အရင်လို အလုပ်တွေ ပိတ်ပစ်လိုက်မှာ၊ အလုပ်တွေ ထိခိုက်တာတွေ ဖြစ်လာမှာကို စိုးရိမ်မှုတွေ ရှိနေတယ်လို့လည်း အလုပ်သမားရေး ဆောင်ရွက်နေသူတွေက ပြောဆိုခဲ့ပါတယ်။
ထိုင်းနိုင်ငံမှာ မြန်မာရွှေ့ပြောင်းအလုပ်သမား ၃ သန်းထက်မနည်း အလုပ်လုပ်ကိုင်နေတာဖြစ်ပြီး ထိုင်းနိုင်ငံမှာ ကိုဗစ်ကူးစက်မှု ဖြစ်ချိန်မှာ မြန်မာအလုပ်သမား သိန်းဂဏန်းလောက် ကိုဗစ်ကူးစက်မှု ဖြစ်ခဲ့ပါတယ်။