ကျွဲကောသီးဟာ Citrus အနွှယ်ဝင်ဖြစ်ပြီး အောက်ပါ အာဟာရတန်ဖိုးနဲ့ ကျန်းမာရေးဆိုင်ရာ အကျိုးကျေးဇူးတွေ ပါဝင်နေပါတယ်။ ကျွဲကောသီး တစ်ခွက်စာ (၁၉၀ ဂရမ်) မှာ ပါဝင်တဲ့ ကျန်းမာရေး တန်ဖိုးတွေက ဗီတာမင်စီ (တစ်နေ့တာ လိုအပ်တဲ့ ပမာဏရဲ့ ၁၉၃ ရာခိုင်နှုန်း)၊ ပိုတက်စီယမ် (တစ်နေ့တာ လိုအပ်တဲ့ ပမာဏရဲ့ ၁၂ ရာခိုင်နှုန်း)၊ အမျှင်ဓာတ် (တစ်နေ့တာ လိုအပ်တဲ့ ပမာဏရဲ့ ၈ ရာခိုင်နှုန်း) တို့ ဖြစ်ကြပါတယ်။
ဆီးလမ်းကြောင်း ပိုးဝင်မှုကို သက်သာစေခြင်း
ရေအများအပြား သောက်တာနဲ့ ခရင်မ်ဘယ်ရီ ဖျော်ရည်သောက်တာတွေက ဆီးလမ်းကြောင်း ပိုးဝင်မှုကို တွန်းလှန်နိုင်အောင် ကူညီနိုင်တဲ့ ထိရောက်တဲ့ နည်းတွေပဲ ဖြစ်ပါတယ်။ ဗီတာမင်စီ အများအပြား ပါဝင်တဲ့ ကျွဲကောသီးဟာ ကိုယ်ဝန်ဆောင်ချိန် အတောအတွင်း ရောင်ရမ်းမှုကို တွန်းလှန်နိုင်ပါတယ်။ ဗီတာမင်စီက ဆီးလမ်းကြောင်းရှိ ဘက်တီးရီးယား ကြီးထွားပြန့်ပွားမှုကို လျော့ကျစေပြီး ဆီးထဲက အက်စစ် ဂုဏ်သတ္တိကို မြင့်တက်စေပါတယ်။
အနာကို မြန်မြန်ကျက်စေခြင်း
ခွဲစိတ်ကုသမှု ခံယူထားတဲ့အခါ ဗီတာမင်စီ များများပါဝင်တဲ့ ကျွဲကောသီးနဲ့ တခြား အချဉ်အရသာရှိတဲ့ သစ်သီးဝလံတွေကို စားသင့်ပါတယ်။ ဗီတာမင်စီဟာ အရေပြား တင်းရင်းစေတဲ့ ကော်လာဂျင် ဖြစ်ပေါ်မှုမှာ ပါဝင်တဲ့ အင်ဇိုင်းအကူ ဖြစ်သလို အရေပြားရဲ့ ဆွဲဆန့်အားကို ကောင်းမွန်စေကာ အနာကျက် မြန်စေပါတယ်။
သွားနှင့် ခံတွင်းကို ကျန်းမာစေခြင်း
သွားဖုံး သွေးထွက်တာနဲ့ သွားဆုံးရှုံးတာက ဗီတာမင်စီ ချို့တဲ့လို့ ဖြစ်ရတဲ့ လက္ခဏာတစ်ရပ် ဖြစ်နိုင်ပါတယ်။ ကော်လာဂျင်က အရေပြား ဖြစ်ပေါ်ရေးအတွက် အရေးပါရုံသာမက သွားနဲ့ သွားဖုံးတွေ ကျန်းမာစေဖို့လည်း တည်ဆောက်ပေးပါတယ်။
သွေးအားနည်းရောဂါ မဖြစ်အောင် ကာကွယ်ပေးခြင်း
ဗီတာမင်စီဟာ ခန္ဓာကိုယ်ထဲမှာ သံဓာတ် စုပ်ယူရေးကို ကောင်းမွန်စေတယ်လို့ သိပ္ပံနည်းကျ လေ့လာမှုတွေအရ သိရပါတယ်။ ဒါကြောင့် သံဓာတ် ဖြည့်စွက်ဆေး မှီဝဲနေရင် လိမ္မော်ရည် သောက်ပေးပါ၊ ဒါမှမဟုတ် အသားနဲ့အတူ ဗီတာမင်စီ များစွာပါဝင်တဲ့ ဟင်းသီးဟင်းရွက်တွေကို စားပေးပါ။ ဒီအာဟာရဓာတ် နှစ်ခုစလုံးဟာ အူထဲကို တစ်ချိန်တည်း အတူတူ ရောက်ရှိနိုင်ပါတယ်။
အအေးမိတာနဲ့ တုပ်ကွေး မဖြစ်အောင် ကာကွယ်ပေးခြင်း
ဗီတာမင်စီက ပဋိပစ္စည်းရဲ့ လုပ်ငန်းဆောင်တာကို လှုံ့ဆော်ပေးရာမှာ အလွန်အရေးပါသလို ခန္ဓာကိုယ်ထဲကို ကျူးကျော်ဝင်ရောက်လာတဲ့ ဘက်တီးရီးယား၊ ဗိုင်းရပ်စ်ပိုးတွေလို ပြင်ပရန်သူတွေကို တွန်းလှန်ပေးနိုင်တဲ့ ကိုယ်ခံအား ဆဲလ်တွေကိုလည်း လှုံ့ဆော်ပေးနိုင်ပါတယ်။ ဒါကြောင့် အသက်ရှူစနစ်ဆိုင်ရာ ပြဿနာတွေ မရအောင် ကာကွယ်ပေးနိုင်တာပါ။
သွေးဖိအားကို ထိန်းချုပ်ပေးခြင်း
ကျွဲကောသီးကို စားသင့်တဲ့ နောက်ထပ် အကြောင်းရင်းတစ်ခုက ပိုတက်စီယမ် ပါဝင်မှု မြင့်မားလို့ပဲ ဖြစ်ပါတယ်။ ပိုတက်စီယမ်ဟာ သွေးတိုးတာကို လျော့ကျစေပါတယ်။ ထောပတ်သီး၊ ငှက်ပျောသီးနဲ့ မာလကာသီးတို့ဟာ ပိုတက်စီယမ် ပေါများစွာ ပါဝင်တဲ့ သစ်သီးတချို့ ဖြစ်ပါတယ်။
အရိုးပါးရောဂါ မဖြစ်အောင် ကာကွယ်ပေးခြင်း
လေ့လာမှုအရ အစားအသောက်ကနေ ပိုတက်စီယမ် များများရရင် အရိုးသိပ်သည်းဆကို ကောင်းမွန်စေတယ်လို့ သိရပါတယ်။
ခြေထောက်ကြွက်တက်မှု မဖြစ်အောင် ကာကွယ်ပေးခြင်း
သင်က မကြာခဏ ခြေထောက် ကြွက်တက်တဲ့ ဝေဒနာ ဖြစ်တယ်ဆိုရင် သင့်ခန္ဓာကိုယ်က ပိုတက်စီယမ်ကို ပိုမို လိုအပ်တယ်ဆိုတဲ့ သဘောပဲ ဖြစ်ပါတယ်။ ပိုတက်စီယမ်ဟာ ကြွက်သား ဆွဲဆန့်မှုနဲ့ နာ့ဗ်ကြောအချင်းချင်း ဆက်သွယ်မှုမှာ မရှိမဖြစ် အရေးပါနေပါတယ်။
အူမကြီးရဲ့ လုပ်ငန်းဆောင်တာကို ကောင်းမွန်စေခြင်း
ကျွဲကောသီးမှာ အမျှင်ဓာတ် အများအပြား ပါဝင်ပြီး အူလှုပ်ရှားမှုကို ပုံမှန် ကောင်းမွန်စေပါတယ်။ ဒါ့အပြင် လိပ်ခေါင်းနဲ့ အူမကြီးကင်ဆာ မဖြစ်အောင် ကာကွယ်ပေးနိုင်ပါတယ်။
ကိုယ်အလေးချိန်ကို ထိန်းချုပ်ပေးခြင်း
ကျွဲကောသီးမှာပါတဲ့ အမျှင်ဓာတ်ဟာ ကိုယ်အလေးချိန် ထိန်းချုပ်ရေးမှာ အရေးပါတယ်ဆိုတာ သင် သိပါရဲ့လား။ အမျှင်ဓာတ် များများပါတဲ့ အစာတွေက အစာအိမ်ထဲမှာ ခပ်ကြာကြာ ရှိနေပြီး ဗိုက်ပြည့်တဲ့ ခံစားချက်ကို ရရှိစေတယ်လို့ ကျွမ်းကျင်သူတွေက ယုံကြည်ကြပါတယ်။ အစာကို ကြာကြာ ဝါးစားရလေလေ၊ ဗိုက်ပြည့်တဲ့ ခံစားချက်ကို ရရှိလေလေ ဖြစ်ပြီး အစာကို အလွန်အကြူး မစားမိအောင် ရှောင်ရှားနိုင်လေလေ ဖြစ်ပါတယ်။ ကျွဲကောသီးဟာ ကယ်လ်စီယမ်နဲ့ ပရိုတင်းပါတဲ့ အသီးလည်း ဖြစ်ပါတယ်။
Myanmar Health Products Guide