ကိုဗစ် ကာကွယ်ဆေးကို ပုဂ္ဂလိကလုပ်ငန်းများ တင်သွင်း ခွင့်ပြုထားသော်လည်း ခွင့်ပြုချက်ရထားသည့် ကုမ္ပဏီ ဘက်မှ တင်သွင်းမှု မရှိသေးကြောင်း အစားအသောက်နဲ့ ဆေးဝါးကွပ်ကဲရေး ဦးစီးဌာန (FDA) က သိရသည်။

ပုဂ္ဂလိက ဆေးကုမ္ပဏီ ၄ ခုခန့် ကိုဗစ်ကာကွယ်ဆေး တင်သွင်းရန် လျှောက်ထားသော်လည်း SML Pharmaceutical Trading Co., Ltd တခုတည်းသာ ကိုဗစ်ကာကွယ်ဆေး တင်သွင်းခွင့် ရရှိထားကြောင်း FDA မှ ညွှန်ကြားရေးမှူးချုပ် ဒေါက်တာ ခင်ဇော်က ပြောသည်။

SML အနေဖြင့် အိန္ဒိယနိုင်ငံထုတ် COVAXIN အလုံးရေ ၁ သိန်း တင်သွင်း ခွင့်ပြုချက် ရထားသော်လည်း ယခုအချိန်အထိ တင်သွင်းနိုင်ခြင်း မရှိသေးကြောင်း သိရသည်။

ပြီးခဲ့သည့် ဧပြီလမှ စတင်က အိန္ဒိယနိုင်ငံသည် နိုင်ငံတွင်း လိုအပ်ချက်ကြောင့် ကိုဗစ်ကာကွယ်ဆေးများကို နိုင်ငံတကာသို့ ပေးပို့နေမှုကို ရပ်ဆိုင်းခဲ့ခြင်း ဖြစ်သည်။

ပုဂ္ဂလိက ကဏ္ဍအား ကိုဗစ်ကာကွယ်ဆေး တင်သွင်းဖြန့်ချိခွင့် ပေးလိုက်သည့်နောက်တွင် ပုဂ္ဂလိက ဆေး ရုံ၊ စင်တာများတွင် ကာကွယ်ဆေး ထိုးနှံလိုသူများအနေဖြင့် ကြိုတင် စာရင်းပေးသွင်းထားပြီး ဆေးရောက်ရှိလာမည့် အချိန်ကို စောင့်ဆိုင်းနေကြခြင်း ဖြစ်သည်။

ကိုဗစ်ကာကွယ်ဆေးများသည် သတ်မှတ်ထားသော အအေးချိန်အတိုင်း သိုလှောင်သိမ်းဆည်းထားရခြင်း ဖြစ်ရာ အွန်လိုင်း ပေါ်တွင် ရောင်းချနေသည့် ကိုဗစ်ကာကွယ်ဆေးများသည် မည်သည့်နည်းနှင့်မျှ စိတ်ချခြင်း မရှိကြောင်း ကျန်းမာရေး ပညာရှင်များက သတိပေးပြောဆိုသည်။

ထိုကဲ့သို့ ရောင်းချနေမှုများသည် အကျိုးသက်ရောက်မှု မရှိသည့် ကာကွယ်ဆေး အတုများ ဖြစ်နိုင်သကဲ့သို့ ကာကွယ်ဆေး အစစ်ဖြစ်လျှင်လည်း သတ်မှတ်ထားသည့် အအေး စံနှုန်းနှင့်အညီ ထိန်းသိမ်းထားခြင်း မရှိသည့်အတွက် အကျိုးသက် ရောက်မှု မရှိနိုင်ကြောင်းနှင့် သတိထားရန်လိုကြောင်း ကျန်းမာရေး ပညာရှင်များက ဆိုသည်။

ကိုဗစ်ကာကွယ်ဆေး ထိုးနှံရာတွင် ကျွမ်းကျင်သည့် ဆရာဝန်များနှင့် တိုင်ပင်ပြီးမှသာ ထိုးနှံသင့်ပြီး အရည်အသွေး မပြည့်မီ သည့် ကာကွယ်ဆေးများကို ထိုးနှံလျှင် သေဆုံးသည်အထိ ဖြစ်နိုင်ကြောင်း ကျန်းမာရေး ပညာရှင်များက ပြောသည်။

ရင်းမြစ် ဧရာဝတီ