ကိုဗစ်ကူးစက်မှုတွေ တိုးမြင့်လို့ ကန့်သတ်ချက်တွေချထားတဲ့ သြစတေးလျနဲ့ နယူးဇီလန်တို့မှာ တချို့ ကန့်သတ်ချက်တွေ ဖြေလျှော့တာ၊ တချို့ ဆက်ထားရှိတာတွေ လုပ်ထားပါတယ်။
သြစတေးလျနိုင်ငံက လူဦးရေထူထပ်တဲ့ Sydney မြို့မှာတေ့ာ ကလေးကျောင်းတွေ ပြန်ဖွင့်ပါတယ်။ Sydney မြို့တည်ရှိတဲ့ New South Wales ပြည်နယ်မှာ ၁၆ နှစ်အထက် အရွယ်ရောက်ပြီးသူ ၈၀% ကာကွယ်ဆေးထိုးပြီးပြီ ဖြစ်လို့ ကန့်သတ်ချက်တွေကို ပြန်ပြီး ဖြေလျှော့ပေးနေတာဖြစ်တယ်လို့ အရာရှိတွေက ပြောပါတယ်။ အဆောက်အဦးအတွင်း နှာခေါင်းစည်းမဖြစ်မနေတပ်ရမယ်ဆိုတဲ့ ကန့်သတ်ချက်မရှိတော့ဘဲ စားသောက်ဆိုင်တွေ၊ ဘားဆိုင်တွေနဲ့ အားကစားရုံတွေမှာ ကာကွယ်ဆေးထိုးပြီးသူတွေကို ပြန်လက်ခံနေပါပြီ။
သြစတေးလျက ဒုတိယအကြီးဆုံးမြို့ကြီးတမြို့ဖြစ်တဲ့ Melbourne မြို့ရှိတဲ့ Victoria ပြည်နယ်မှာတော့ ၁၆ နှစ်အထက်တွေမှာ ကာကွယ်ဆေးအပြည့်အဝထိုးပြီးသူ ၇၀ % ရှိလာတာကြောင့် လာမယ့် သောကြာနေ့မှာ အပြင်မသွားရ ကန့်သတ်ချက်ကို ဖယ်ရှားပေးတော့မှာဖြစ်ပါတယ်။ သြစတေးလျနိုင်ငံမှာ ဒီလိုကန့်သတ်ချက်တွေ တင်းတင်းကြပ်ကြပ်ချပြီး ကိုဗစ်ရောဂါပျံ့ပွားမှု ထိန်းချုပ်ရေး လုပ်ဆောင်တာမှာ အောင်မြင်မှု ရှိတာဖြစ်ပါတယ်။
နယူးဇီလန်နိုင်ငံမှာတော့ အခြေအနေက ဒီလိုမဟုတ်ပဲ ကာကွယ်ဆေးထိုးနှုန်းမြင့်ပေမဲ့ နောက်ထပ် ၂ ပတ် မလိုအပ်ပဲ အပြင်မထွက်ရ ကန့်သတ်မယ်လို့ ဝန်ကြီးချုပ်က ဒီကနေ့ပဲ ကြေညာသွားပါတယ်။ delta ဗီဇပြောင်းပိုးကြောင့် ဆေးရုံတင်ရသူ အရေအတွက် များနေသေးလို့ အခုလို လုပ်ဆောင်ရတာဖြစ်တယ်လို့လည်း ပြောသွားပါတယ်။
နယူးဇီလန်မှာက မနှစ်ကဆို ကိုဗစ်ကူးစက်မှုအသစ် တခုမှ မရှိတော့တဲ့ထိ ဖြစ်သွားပြီးမှ သြဂုတ်လမှာ delta ဗီဇပြောင်းပိုးနဲ့ ကူးစက်မှုတွေ ပြန်ဖြစ်လာတာ ဖြစ်ပါတယ်။ ဝန်ကြီးချုပ်က အရင်က သူချမှတ်ခဲ့တဲ့ ကိုရိုနာဗိုင်းရပ်စ်ကင်းစင်ရေးမူကို စွန့်လွှတ်လိုက်ပြီး အခု ကိုရိုနာဗိုင်းရပ်စ်ကို ထိန်းချုပ်ပြီး နေထိုင်သွားရေးမူနဲ့ လုပ်ဆောင်နေတာ ဖြစ်ပါတယ်။
