တောင်ကိုရီးယား ကိုဗစ်ကူးစက်မှု ဆိုးဝါးနေ
တောင်ကိုရီးယားတွင် ပြီးခဲ့သည့် သီတင်းပတ်တွင် ပျမ်းမျှအားဖြင့် တစ်နေ့လျှင် ရောဂါဖြစ်ပွားမှု ၆,၃၂၀ အစီရင်ခံခဲ့ပြီး နိုဝင်ဘာ ၁ ရက်မတိုင်မီ ရက်သတ္တပတ်က ပုံမှန်ဖြစ်ပွားမှုထက် သုံးဆပိုများသည်။ ၇ ရက်ကြာ ပျှမ်းမျှသေဆုံးမှုအသစ်အရေအတွက်သည် ၅ ဆနီးပါး ခုန်တက်သွားသည်။
နိုဝင်ဘာလ ၁၁ ရက်တွင် သေဆုံးသူ ၈၀ ဦး ရှိခဲ့ရာ တစ်ရက်အတွင်းသေဆုံးသူဦးရေ အများဆုံး စံချိန်သစ် ဖြစ်ခဲ့သည်။
နိုင်ငံတစ်ဝှမ်းရှိ ဆေးရုံများတွင် လူနာကုတင်နေရာ ပြတ်လပ်မှုမှာ စိုးရိမ်ရသည့်အဆင့်သို့ ရောက်ရှိနေပြီး အထူးကြပ်မတ်ကုသရေးကုတင် ၈၀ ရာခိုင်နှုန်းကျော်သည် လူနာများဖြင့် ပြည့်နေပါသည်။
ဆေးရုံများသည် ၎င်းတို့၏ အထူးကြပ်မတ်ကုသဆောင်ကုတင်များကို Covid-19 လူနာအတွက် ကုတင်များအဖြစ်သို့ ပြောင်းလဲသုံးစွဲခိုင်းခြင်းကြောင့် Covid-19 မဟုတ်သော လူနာများအား ကုသမှု ခံယူရန် အခက်ကြုံနေရသည်ဟု Samsung Medical Center မှ အရေးပေါ် ကုသရေး အထူးကု ဆရာဝန် ဒေါက်တာ Suh Gee-young မှ ပြောကြားခဲ့ပါသည်။
"ဆေးရုံ တက်သင့်တဲ့လူနာတွေက အိမ်မှာပဲ နေကြရတယ်။ အထူးကြပ်မတ်ကုသဆောင် ICU မှာနေသင့်တဲ့သူတွေကတော့ ICU မဟုတ်တဲ့အဆောင်တွေမှာရှိပါတယ်" ဟု Association of Physicians for Humanism နှင့် အခြားဆေးဘက်ဆိုင်ရာနှင့် လူမှုဖူလုံရေးအဖွဲ့ လေးဖွဲ့က ပူးတွဲထုတ်ပြန်ချက်တွင် ဖော်ပြထားသည်။