ဆေးပတ်ကြိမ်ရေ ရာချီစာအတွက် ကမ္ဘာ့ပထမဆုံး ကိုဗစ်-၁၉ သောက်ဆေးတောင့်ဖြစ်လာမည့် molnupiravir ဆေးတောင့်များကို ဝယ်ယူရန် ပြင်ဆင်နေကြောင်း ဟောင်ကောင်မှ ဆေးရုံအာဏာပိုင်က ထုတ်ဖော်ပြောကြားသည်။

molnupiravir အမည်ရှိ ကိုဗစ်-၁၉ သောက်ဆေးတောင့်ကို နိုင်ငံပေါင်း ၂၀ မှအရွယ်ရောက်ပြီးသူ ဆီးချို၊ အဝလွန်ခြင်း၊ နှလုံးရောဂါ စသဖြင့် ရောဂါအခံ ရှိသည့် ကိုဗစ်လူနာများထဲမှ ကျပန်း ရွေးချယ်ထားသော လူနာ ၇၇၅ ဦးဖြင့် စမ်းသပ်ခဲ့ရာ ဆေးစွမ်းထက်သည့် ရလဒ်များ ရရှိခဲ့သည်။
ဆေးပတ်လည်ရန် လူနာတို့သည် ၅ ရက် ဆက်တိုက် molnupiravir ကို နေ့စဉ် သတ်မှတ်ထားသည့်အတိုင်း ဆေးသောက်ရသည်။ ဆေးတိုက်ထားသူတို့တွင် ၂၈ ဦး၊ ရာခိုင်နှုန်းအားဖြင့် ၇.၃% သာ ဆေးရုံတင်ရသည်။
ဟောင်ကောင်မှ Hospital Authority က လူနာ ၅၀၀ ကုသရန်အတွက် ဆေးပတ်လည်အောင် ဆေးတိုက်နိုင်မည့် ပမာဏကို ပထမအသုတ်အနေဖြင့် ဝယ်ယူရန် စီစဉ်နေကြောင်း ထုတ်ဖော်ပြောကြားခဲ့သည်။

Merck အမည်ဖြင့် ဆေးဝါးများ မြောက်အမေရိကဈေးကွက်တွင် ရောင်းချနေသာ အမေရိကန် ဆေးကုမ္ပဏီ MSD နှင့် ဆွေးနွေးညှိနှိုင်းနေကြောင်းလည်း ထုတ်ဖော်ပြောကြားသည်။ လိုအပ်သော စာရွက်စာတမ်းများ လက်မှတ်ရေးထိုးပြီးသည့် အဆင့်သို့ ရောက်ရှိနေပြီဟု ဆိုသည်။
Merck က ကိုဗစ်-၁၉ သောက်ဆေးတောင့် molnupiravir သည် ကိုဗစ်လူနာကို ဆေးရုံးတက်ရခြင်းနှင့် သေဆုံးခြင်းတို့မှ ကာကွယ်ရန် ထိရောက်မှု ၅၀ % ရှိသည်ဟု ထုတ်ပြန်ကြေညာထားသည်။ အမေရိကန် FDA ထံသို့ အရေးပေါ် အနေဖြင့် သုံးစွဲရန် ခွင့်ပြုချက် ရရှိရန် အချက်အလက်များ တင်ပြလျှောက်ထားပြီးပြီ ဖြစ်သည်။ လာမည့် နှစ်ပတ်အတွင်း အတည်ပြု ခွင့်ပြုချက် ရနိုင်ဖွယ် ရှိကြောင်း MSD က ပြောကြားသည်။ အခြားနိုင်ငံများရှိ FDA အသီးသီးထံသို့လည်း အလားတူ အတည်ပြု ခွင့်ပြုချက် ရရှိအောင် ဆောင်ရွက်သွားမည်ဟု ဆိုသည်။

ကိုဗစ်ရောဂါ စတင်ဖြစ်ပွားသည့် ပထမအပတ်တွင် molnupiravir ကို 400 သို့မဟုတ် 200 milligram တိုက်ခြင်းအစား 800 milligrams နေ့စဉ်တိုက်ပေးပါက အကောင်းဆုံး ရလဒ်များ ထွက်ပေါ်သည်ဟု ဆိုသည်။