၁၆ နှစ်နဲ့ ၁၇ နှစ်အရွယ် လူငယ်တွေ အားဖြည့်ကိုဗစ်ဆေးထိုးဖို့ FDA ခွင့်ပြု

ဗီဇပြောင်း ကိုဗစ်ပိုးသစ် Omicron ပျံ့နှံ့ကူးစက်နေတဲ့ အမေရိကန်ပြည်ထောင်စုမှာ အသက် ၁၆ နှစ်နဲ့ ၁၇ နှစ်အရွယ် ဆယ်ကျော်သက်တွေကို ကိုဗစ်အားဖြည့်ဆေးထိုးဖို့ အမေရိကန် ဆေးဝါးနဲ့ အစားအသောက်ဆိုင်ရာ ကွပ်ကွဲရေး (FDA) ဌာနက ဒီဇင်ဘာ ၉ ရက်နေ့မှာ ခွင့်ပြုချက်ပေးလိုက်ပါတယ်။

FDA က ကြာသပတေးနေ့မှာ ခုလိုခွင့်ပြုလိုက်ပြီး နာရီပိုင်းအကြာမှာပဲ Pfizer ကိုဗစ်ကာကွယ်ဆေး ထိုးထားတာ အနည်းဆုံး ၆ လကြာရင် အသက် ၁၆ နှစ်နဲ့ အထက်တွေ တတိယ အားဖြည့် ကိုဗစ်ကာကွယ်ဆေးထိုးနိုင်ပြီလို့ ရောဂါကာကွယ် ထိန်းချုပ်ရေးဌာန (CDC) ကလည်း အကြံပြု ခွင့်ပြုချက် ထုတ်ခဲ့ပါတယ်။

Omicron ကိုဗစ်ပိုးသစ်နဲ့ပတ်သက်လို့ မေးခွန်းအားလုံးအတွက် အဖြေမရှိသေးပေမယ့် ကနဦးလေ့လာချက်တွေအရ အားဖြည့် ကိုဗစ်ကာကွယ်ဆေးဟာ Omicron နဲ့ တခြား ကိုဗစ်ရောဂါပိုးတွေကို ပိုပြီးအကာအကွယ်ပေးနိုင်တယ်လို့ CDC ဌာနညွှန်ကြာရေးမှူး Dr. Rochelle Walensky ကပြောကြားထားပါတယ်။

ကိုဗစ်ကာကွယ်ဆေးတွေဟာ လုံခြုံပြီး ထိရောက်တဲ့အတွက် ၁၆ နှစ်နဲ့ ၁၇ နှစ်အရွယ် ဆယ်ကျော်သက်တွေလည်း Pfizer အားဖြည့် ကိုဗစ်ကာကွယ်ဆေးထိုးကြဖို့ သူကတိုက်တွန်းထားပါတယ်။

အမေရိကန်ပြည်ထောင်စုမှာ အသက် ၅ နှစ်အရွယ်ကစလို့ ကလေးငယ်တွေကို ကိုဗစ်ကာကွယ်ဆေးထိုးဖို့ ခွင့်ပြုထားပါတယ်။ ၅ နှစ်ကနေ ၁၆ နှစ်ကြား ကလေးတွေအနေနဲ့ အားဖြည့်ကိုဗစ်ကာကွယ်ဆေး ထိုးဖို့ကိုတော့ တာဝန်ရှိသူတွေ ခွင့်မပြုသေးပါဘူး။

Omicron ကိုဗစ်ပိုးသစ်ကူးစက်တဲ့ ပြည်နယ်တွေ အမေရိကန်ပြည်ထောင်စုမှာ များလာနေတဲ့တချိန်ထဲမှာပဲ ပြည်သူတွေကို ကိုဗစ်အားဖြည့်ကာကွယ်ဆေး ထိုးကြဖို့ တာဝန်ရှိသူတွေနဲ့ ကျန်းမာရေးပညာရှင်တွေ တိုက်တွန်းနေကြပါတယ်။

VOA