ကိုရိုနာဗိုင်းရပ်စ်ကာကွယ်ဖို့ စမ်းသပ်ထုတ်လုပ်ထားတဲ့ ကာကွယ်ဆေးသစ်ကို တရုတ်သိပ္ပံပညာရှင်တွေက လူတွေနဲ့ စမ်းသပ်ပြီး တပတ်မပြည့်ခင်မှာပဲ အဲဒီကာကွယ်ဆေးကို စမ်းသပ်အထိုးခံမယ့် ဒုတိယတသုတ်ကို ရွေးချယ်လိုက်ပြီလို့ တရုတ်အစိုးရပိုင် သတင်းမီဒီယာ တွေကဖော်ပြလိုက်ပါတယ်။ ဒီကာကွယ်ဆေးစမ်းသပ်တဲ့ အစီအစဉ်အတွက် ကိုရိုနာဗိုင်းရပ်စ်စတင်ဖြစ်ပွားခဲ့တဲ့ ဟူဘေးပြည်နယ်ကအသက် ၁၈ နှစ်အထက် လူ ၅၀၀ ကို ခေါ်ယူစုဆောင်းနေတာဖြစ်ပါတယ်။

အခုထုတ်လုပ်နေတဲ့ ကာကွယ်ဆေးတွေအနေနဲ့ အဆင့် ၃ ဆင့် ဒါမှမဟုတ် ၄ ဆင့်အထိ စမ်းသပ်စစ်ဆေးမှုတွေ လုပ်သွားမှာရမှာဖြစ်ပါတယ်။ စမ်းသပ်မှုတွေလုပ်နေစဉ်ကာလအတွင်း လူအရေအတွက်ကိုလည်း တိုးပြီးလုပ်သွားမှာဖြစ်တဲ့အပြင် အဲဒီနောက် ဆေးရဲ့ ဘေးထွက် ဆိုးကျိုးတွေ ဘယ်လောက်ရှိတယ်ဆိုတာနဲ့ ဘယ်လောက်ထိရောက်မှု ရှိသလဲဆိုတာတွေကို အနီးကပ်စောင့်ကြည့်ပြီး ဆုံးဖြတ်သွားမှာ ဖြစ်ပါတယ်။ ကာကွယ်ဆေးစမ်းသပ်မှုတွေဟာ နှစ်နဲ့ချီကြာနိုင်ပေမယ့် အခုလက်ရှိဖြစ်နေတဲ့ ကပ်ရောဂါမှာတော့ ပိုပြီးတော့ မြန်မြန်ဆန်ဆန် ထုတ်လာနို်င်တဲ့ အခြေအနေရှိတယ်လို့ခန့်မှန်းရပါတယ်။

ဒါဟာ ဒုတိယအဆင့်စမ်းသပ်မှုကို လျင်လျင်မြန်မြန် လုပ်ဆောင်လိုက်တာဖြစ်ပြီး ဒါကိုကြည့်ခြင်းအားဖြင့် တရုတ်နိုင်ငံအနေနဲ့ အလွန်ကိုစနစ်တကျ နဲ့ အမြန်လုပ်ဆောင်နိုင်တယ်ဆိုတာကို ပြသနေတယ်လို့ အမေရိကန်ပြည်ထောင်စု Oregon ပြည်နယ်မှာရှိတဲ့ မျောက်ဝံနဲ့ လူမျိုးနွယ်စုတွေကို လေ့လာတဲ့ အမျိုးသား သုတေသနဌာနက ကာကွယ်ဆေးလေ့လာသူ Mark Slifka က ပြောပါတယ်။

တရုတ်နိုင်ငံက ကာကွယ်ဆေးစမ်းသပ်မှု ပထမအဆင့်ကို ပြီးခဲ့တဲ့ မတ်လ ၁၆ ရက်နေ့က လုပ်ဆောင်ခဲ့ပါတယ်။ တချိန်တည်းမှာပဲအမေရိကန်မှာလည်း Morderna Theraputics ဇီဝနည်းပညာကုမ္ပဏီက စမ်းသပ်ထုတ်လုပ်တဲ့ ကာကွယ်ဆေးကို Seattle မြို့ခံတဦး နဲ့ စမ်းသပ်ခဲ့တာဖြစ်ပါတယ်။

VOA Burmese