အင်းယားစင်တာအား Yangon Convention Center တွင် စက်တင်ဘာ(၂၉)ရက်နေ့မှ စတင်တည်ဆောက်လျက်ရှိရာ
တည်ဆောက်ရေးလုပ်ငန်းများ (၇၀)ရာခိုင်နှုန်းအထိ ပြီးစီးနေပြီဖြစ်ကြောင်းသိရသည်။
အင်းယားစင်တာဦးစီးကော်မတီနှင့် လုပ်ငန်းကော်မတီ အတွင်းရေးမှူး ဦးတင့်ဆန်းက "ပြီးစီးမှုအပိုင်းမှာတော့ ကျွန်တော်တို့က အတွင်းအပြင်ဆိုပြီး နှစ်ပိုင်းရှိတာပေါ့။ဒီအင်းယားကိုဗစ်စင်တာကြီးရဲ့ အတွင်းပိုင်းမှာ အခန်းပေါင်း(၁၅၆)ခန်းထိ လျာထားပါတယ်။မူလကတော့ ကျွန်တော်တို့က (၆၀၀)လျာထားပေမယ့် Recreption Areaပေါ့။အဲ့ဒါလေးကိုကျွန်တော်တို့ကသတ်မှတ်လိုက်တယ်။အဲဒီမှာ Food Court ရှိမယ်။နောက်ပြီး အင်တာတိန်းမန့်နေရာလေးတွေ သတ်မှတ်လိုက်တော့ အခန်းကအဲ့လိုဖြစ်သွားတယ်။အခန်းတွေထဲမှာထည့်မယ့် ကုတင်တွေက အားလုံး(၆၆၆)လုံး၊အတွင်းထဲမှာရှိတဲ့ ကိုဗစ်လူနာတွေနေဖို့ ကုတင်တွေအားလုံးကို ကျွန်တော်တို့ပြင်ဆင်ပြီးပြီ။လျှပ်စစ်မီးတွေလုပ်ပြီးပြီ၊အဲယားကွန်းတွေပြင်ဆင်ပြီးပြီ၊အဲဒါတွေအားလုံးပြီးပြီ၊နောက်တစ်ခါ သူတို့ကိုဝန်ဆောင်မှုတွေပေးမယ့် ကျန်းမာရေးဝန်ထမ်းတွေ၊စေတနာ့ဝန်ထမ်းတွေအတွက် စင်တာအပြင်ဘက်မှာ အခန်း(၁၅၀)ဖွဲ့ပြီး ကုတင်တွေလည်းအားလုံးဆောင်ရွက်ပြီး ဖြစ်ပါတယ်ခင်ဗျ၊ဒီစင်တာကြီးတစ်ခုလုံးရဲ့ ပြီးစီးမှုရာခိုင်နှုန်းကတော့ (၇၀)ရာခိုင်နှုန်းပြောလို့ ရပါတယ်"ဟု ပြောသည်။
အင်းယားကိုဗစ်စင်တာသည် ကျန်းမာရေးနှင့်အားကစားဝန်ကြီးဌာန၊ရန်ကုန်တိုင်းဒေသကြီးအစိုးရအဖွဲ့၏ လမ်းညွှန်မှုများနှင့် အညီ ကိုဗစ် ၁၉ ရောဂါကုသရေးအတွက် ကမ္ဘောဇဘဏ်မှ ငွေကျပ်သိန်း(၇၀၀၀)နှင့် ရွှေသံလွင်ကုမ္ပဏီမှ ငွေကျပ်သိန်း(၃၀၀၀) စုစုပေါင်းကျပ်သိန်းတစ်သောင်းကို ကနဦးမတည်လှူဒါန်း၍ အင်းယားစင်တာအား Yangon Convention Center တွင် စတင်တည်ဆောက်လျက်ရှိခြင်းဖြစ်သည်။
အဆိုပါစင်တာမှာ လူနာတင်ကုသိုလ်(၅၀၀)ဆံ ကိုဗစ်စင်တာတစ်ခုဖြစ်ပြီး High-Dependency Unit HDU(၁၆)ကုတင်တစ်ပါတည်း ပါဝင်လာမည်ဖြစ်သည်။လက်ရှိအချိန်တွင် တည်ဆောင်ရေးလုပ်ငန်းများကို ကျန်းမာရေးနှင့်အားကစားဝန်ကြီးဌာနမှ ဆေးဘက်ဆိုင်ရာကျွမ်းကျင်ပညာရှင်များ၏ လမ်းညွှန်မှုများနှင့်အညီ စနစ်တကျစီမံချက်ရေးဆွဲတည်ဆောက်လျက်ရှိပြီး (၁၀)ရက်အတွင်း အပြီးတည်ဆောက်နိုင်ရန် လျာထားဆောင်ရွက်နေခြင်းဖြစ်သည်။
အင်းယားစင်တာတွင် တက်ရောက်မည့်လူနာများအတွက်လိုအပ်မည့် အထူးဆေးဝါးများနှင့် အာယာရပြည့်ဝစေရန်က နံနက်၊နေ့လည်၊ညစာများကို အခမဲ့စီစဉ်ဆောင်ရွက်ပေးထားမည်ဖြစ်ပါသည်။ဆရာဝန်များ သူနာပြုများနှင့် စေတနာ့ဝန်ထမ်းများအတွက်လည်း သီးသန့်အဆောက်အဦးများတစ်ပါတည်းပါဝင်မည်ဖြစ်ကာ (၂၄)နာရီအခမဲ့ Food Court ထားရှိပေးသွားမည် ဖြစ်သည်။